NY masoandro lehibe,

Ny volana aman-kintana

Nataonao hampiravaka

Ny andro aman-alina;

Ny lanitra ao amboninay

Ny tany izay hitsahinay,

Ny rano ‘zay sotroinay,

Dia asanao, Jehovah Ray

2.Ny voninkazo manitra

Ny voankazo mamy koa,

Ny bozaka aman-ahitra,

Ny ala mikirindo koa,

Ny biby voajerinay

Ny vorona ‘zay tsinjovinay,

Ny hazandrano fantatray,

Dia asanao, Jehovah Ray

3.Ka noho ny soa azonay,

Mpanjakan’ny Mpanjaka ô,

Misokatra ny tànanay

Hitondra saotra ho Anao;

Miomana tokoa ny fo,

Ka araka ny sitrapo

No hanateran-dera izao,

Ry Ray Tsitoha, raisonao

Amena